قصة ناكرة الجميل الجزء التاني

وقال

 

لو وصلتوا للجزء ده يبقى معناه إنهم لسه بيدوروا على الدليل ومش لاقيينه

 

أنا ما سيبتوش في البيت

 

ولا في العربية

 

ولا في الشغل

 

أنا خبأته في المكان الوحيد اللي هما عمرهم ما هيفكروا يفتحوه

 

صندوق لعب ابني القديم اللي في أوضة أمي

 

جوه الصندوق هتلاقوا ظرف أزرق

 

وفي الظرف كل المستندات والأوراق اللي تثبت الحقيقة

 

الفيديو وقف

 

الضابط بعت في نفس اللحظة قوة تروح تجيب الصندوق

 

وكريم كان واقف ساكت

 

وشه بقى أصفر

 

وحماتي كانت بتتمتم بكلمات مش مفهومة

 

أما نجلاء فانهارت على الكرسي وهي بتبكي

 

بعد أقل من ساعة رجع أحد أفراد المباحث وهو شايل صندوق خشب قديم

 

فتحوه قدام الكل

 

وكان فعلًا فيه ظرف أزرق

 

الضابط طلعه وبدأ يفتح الأوراق

 

أول ورقة كانت تقرير تحليل DNA

 

وبمجرد ما الضابط قراها رفع عينه ناحية كريم في ذهول

 

وقال

 

غريبة…

 

كريم بص له بتوتر

 

خير يا فندم

 

الضابط قلب الورقة تاني وقال

 

التحليل ده معمول من شهور

 

وبيثبت إن الجنين اللي كانت نجلاء حامل فيه وقتها…

 

مش ابن سامح

 

سكت لحظة

 

وكمل

 

وابن شخص تاني

 

حماتي قفلت عينيها

 

وكريم بدأ يتراجع لورا خطوة

 

الضابط فتح الورقة اللي بعدها

 

كانت صور ورسائل وتحويلات بنكية ومستندات تثبت إن العلاقة بين كريم ونجلاء بدأت قبل وفاة سامح بفترة طويلة

 

لكن آخر ورقة هي اللي قلبت كل حاجة

 

كانت عقد تأمين على حياة سامح بمبلغ ضخم جدًا

 

والمستفيد الوحيد منه…

 

ماكانتش نجلاء

 

ولا أي حد من أهله

 

كان اسم كريم مكتوب بوضوح

 

رفع الضابط الورقة قدام الجميع وقال

 

دلوقتي بقى عندنا سبب واضح يخلينا نعرف مين كان مستفيد من وفاة سامح

 

في اللحظة دي كريم فقد أعصابه تمامًا

 

وبدون أي إنذار جرى ناحية باب الشقة بكل قوته وهو بيحاول يهرب

 

لكن أول ما فتح الباب اتفاجأ بأفراد الشرطة واقفين في السلم مستنيينه

 

ولما حاول يفلت منهم صاح بأعلى صوته

 

أنا هقول الحقيقة كلها… بس مش هنا… لأن اللي بدأ الخطة من الأول… مش أنا…رجال الشرطة مسكوا كريم قبل ما ينزل السلم

 

الضابط بص له وقال

 

يبقى قول الحقيقة دلوقتي

 

كريم قعد على أول درجة وهو بينهج

 

وبعدين رفع عينه ناحية أمه

 

لأول مرة ماكانش بيبصلها باحترام

 

كان بيبصلها بخوف

 

وقال بصوت مكسور

 

أنا غلطت… لكن أول واحد اقترح كل اللي حصل ماكنتش أنا

 

حماتي صرخت فيه

 

اسكت

 

لكن الضابط قال بحزم

 

سيبه يتكلم

 

كريم بلع ريقه وقال

 

بعد ما اتجوزت منى بسنتين ولما عرفنا إنها مش بتخلف بسرعة أمي بدأت كل يوم تقولي إن اسم العيلة هيضيع وإن لازم يبقى عندنا حفيد